საშიში: შიშის მომგვრელი, სახიფათო (საშიში ავადმყოფობა / ცხოველი); საშინელი: 1. სა­ზარელი (საშინელი ურჩხული / ხმა...); 2. აუტანელი. გაუსაძლისი. შემაწუხებელი, მოუთმენელი (საშინელი ამინდი / პირობები / სიძვირე / ტკივილი...).

საშუალი (საშუალი გვარის ზმნა; საშუალი ქართული); საშუალო (არითმეტიკული / ხელფასი / განათლება / მოსავლიანობა).

საშური: საჩქარო, სასწრაფო, დასაშურებელი: „კნიაზო, წამო! რაღას იცდი, გვიგვიანდება, დრო საშურია“ (ილია); შესაშური: შურის აღმძვრელი, სახარბიელო, შესაშურებელი: „ფრინველთ, მცენარეთ ცხოვრება გამიხდა შესაშურია“ (ვაჟა).

საცოლე: ვინც ცოლად უნდა ითხოვონ; საცოლო: ვისაც ცოლის შერთვა შეჰფერის.

საძილე (არტერია / ტომარა / წამალი...); საძინებელი (ოთახი).

საწვიმარი: 1. წყალგაუმტარი ქსოვილის სამოსელი; 2. ქოლგა; 3. წვიმის მომყვანი (საწვიმარი ღრუბელი); 4. წვიმის წყლისთვის განკუთვნილი; წვიმის წყლის სადენი (საწვიმარი მილი); საწვიმური: შენობის სახურავზე გაკეთებული თუნუქის ძაბრი, რომლითაც სახურავზე დაგროვებული წვიმის წყალი ჩადის საწვიმარ მილში.

სახალხო (გმირი / მოძრაობა / კრება; საკუთრება / შემოსავალი / მეურნეობა; დემონსტრაცია / ლექციები); შდრ.: სახალხო მხატვარი; სახალხო არტისტი; ხალხური (შემოქმედება / პოეზია / ცეკვები...).

სახელი (ადამიანისა / ცხოველისა / ფრინველისა / მცენარისა); სახელწოდება (ქვეყნისა / ქალაქისა / ქუჩისა / ჟურნალისა / ფილმისა / რომანისა).

სახელმწიფო (ზედსართავის მნიშვნელობით): ბიუჯეტიდან დაფინანსებული დაწესებულება (სახელმწიფო თეატრი / გადასახადი / უნივერსიტეტი...); სახელმწიფოებრივი: სახელმწიფოს კუთვნილი, სახელმწიფოსთვის დამახასიათებელი, სახელმწიფოსთან დაკავშირებული (სახელმწიფოებრივი ინტერესები / საქმიანობა / მიდგომა...).

სახელო (კაბისა / პიჯაკისა...); სახელური (კარისა...).

საჯარო (ბიბლიოთეკა / განხილვა / ვაჭრობა / ლექცია / სკოლა...); საჯარისო (ნაწილები / შენაერთი / ფორმირება; წესდება...).

საჰაერე: სპეც. ჰაერის მიწოდების მარეგულირებელი სარკმელი ღუმელში; საჰაერო: ჰაერში (ცაში) მოქმედი, არსებული (საჰაერო სივრცე / ბრძოლა / გზა / ტრანსპორტი / განგაში...).

სეკუნდი: 1. კუთხისა და რკალის საზომი ერთეული, უდრის გრადუსის 1/360 ნაწილს; აღი­ნიშ­ნება ასე: 90"; 2. მოძვ. წამი; სეკუნდა: მუს. დიატონიკური გამის მეორე საფეხური; ინტერ­ვალი ორ მეზობელ საფეხურს შორის (დიდი / მცირე სეკუნდა).

სემინარიული (ცხოვრება / რეჟიმი); სემინარული (მეცადინეობა).

სენიორი: 1. ესპანეთში – ბატონი; 2. მსხვილი მემამულე შუა საუკუნეების დასავლეთ ევრო­პაში; სინიორი: იტალიაში – ბატონი.

სეპარატული: ომის დროს კოალიციაში მყოფი სახელმწიფოს მიერ მოწინააღმდეგესთან დადებული ზავი მოკავშირეების თანხმობის გარეშე (სეპარატისტული ზავი); სეპარატისტული: პოლიტ. სეპარატისტისთვის დამახასიათებელი; სეპარატიზმთან დაკავშირებული (სეპარა­ტიზმი – გამოყოფისკენ სწრაფვა; სახელმწიფოს ერთი ნაწილის გამოყოფისა თუ ავტონომიის სტატუსის მინიჭებისათვის გამიზნული მოძრაობა): სეპარატისტული დამოკიდებულება / მთავრობა.

სერვიზი: სადილის, ჩაის, ყავის... ჭურჭლის მთელი კომპლექტი; სერვისი: მომსახურება.

სექტორი: 1. მათემ. წრის ნაწილი, რომელიც შემოსაზღვრულია რკალითა და ორი რა­დიუსით; 2. რაიმე მოედნის, ფართობის ნაწილი, რაიონი; 3. დაწესებულების, ორგანიზაციის, სასწავლებლის ან სახალხო მეურნეობის ფუნქციონირების ერთ-ერთი სფერო, სახე (ქართული სექტორი; კერძო სექტორი); სექცია: 1. სავაჭრო დაწესებულების ერთ-ერთი (ერთგვარი საგნებით მოვაჭრე) ნაწილი (პარფიუმერიის სექცია); 2. რომელიმე დაწესებულების, ორგანიზაციის, განყოფილების წრე, ჯგუფი (სპორტული / ლიტერატურული სექცია); 3. კონფერენციის ქვეგან­ყო­ფილება; 4. მ ე დ ი ც. გვამის გაკვეთა.

სიდაბლე: დაბლის თვისება, დაბალი ტანის ქონა; სიმდაბლე: 1. მოკრძალება, მოწიწება; მორჩილება; 2. ზნე­დაცემულობა, უპატიოსნება, სულმდაბლობა.

სიმპტომური [// სიმპტომატური]: 1. რაც სიმპტომს წარმოადგენს; რაიმეს მომასწავებელი, ნიშან­დობლივი (სიმპტომი – რაიმე დაავადების ან მოვლენის დამახასიათებელი გარეგნული ნიშანი); 2. რაც მიმართულია დაავადებათა სიმპტომების – და არა მათი გამომწვევი მიზეზების – წინააღმდეგ (სიმპტომური / სიმპტომატური მკურნალობა); სიმპტომატიკური: სიმპტო­მატიკისთვის დამახასიათებელი (სიმპტომატიკა – მოძღვრება დაავადებათა სიმპტომების შესახებ): სიმპტომატიკური კვლევა.