უაკ: 621.56/57
სახელმძღვანელოში მოცემულია სამაცივრო ტექნიკაში გამოყენებული ხრახნული და სპირალური ტიპის კომპრესორები. აღწერილია ხრახნული კომპრესორების მუშა პროცესის გაანგარიშების თერმოდინამიკური საფუძვლები და ძირითადი კონსტრუქციული თანაფარდობების დადგენის მეთოდები, ასევე ხრახნული და სპირალური კომპრესორების კონსტრუქციული თავისებურებანი. მოყვანილია ხრახნული კომპრესორების მუშაობაზე სხვადასხვა გეომეტრიული და ფიზიკურ-მექანიკური პარამეტრის გავლენა და ზოგიერთი მნიშვნელოვანი პარამეტრის მუშაუნარიანობის განსაზღვრის მეთოდიკა. სახელმძღვანელო განკუთვნილია სამაცივრო ტექნოლოგიისა და ტექნიკის პროფილის სპეციალობის ბაკალავრიატის სტუდენტებისათვის. იგი შეიძლება გამოიყენონ, აგრეთვე, სამაცივრო მოწყობილობების ტექნიკოსის სპეციალობის პროფესიული სწავლების სტუდენტებმა.
უაკ: 6159:54(0758)
სახელმძღვანელოში განხილულია ორგანიზმისთვის მავნე ნივთიერებათა სახეები, მათი წარმოშობის წყაროები, ორგანიზმზე მოქმედების თავისებურებანი და მათი მეტაბოლიზმი, მძიმე და კეთილშობილი ლითონები, ფეთქებადი ნივთიერებები, ნიადაგი, მათი კვლევის ძირითადი ხერხები და მეთოდები; შხამებს მიკუთვნებული ნივთიერების შემცველობაზე ბიომასალის გამოკვლევის ზოგადი პრინციპები და ბიომასალაში მათი აღმოჩენის სპეციფიკური მეთოდები. წარმოდგენილია სილაბუსით გათვალისწინებული ლაბორატორიული სამუშაოები და მათი შესრულების მეთოდიკა. მოცემულია ტესტები, თითოეული სამი, ოთხი სავარაუდო პასუხით და შუალედური გამოცდებისთვის გათვალისწინებული გართულებული მაგალითები. განკუთვნილია სტუ-ის ქიმიური და კვების პროდუქტების ექსპერტიზის სპეციალობის ბაკალავრიატისა და მაგისტრატურის სტუდენტებისთვის. აგრეთვე, დახმარებას გაუწევს სასამართლო-ქიმიური ექსპერტიზის საკითხებით დაინტერესებულ პირებს.
უაკ: 72
სახელმძღვანელოში განხილულია დიდმალიანი სახურავების მქონე ნაშენთა ძირითადი ხუროთმოძღვრული ნაწილების თავისებურებანი. მასში დიდი ადგილი აქვს დათმობილი საზოგადოებრივი და სამრეწველო შენობების ხუროთმოძღვრულ ნაწილთა თავისებურებებს, ხოლო სხვა დიდმალიანი ნაშენები წარმოდგენილია როგორც ერთეული ნიმუშები, სადაც ასევე ფართოდ გამოიყენება დიდმალიანი კონსტრუქციები. სხვა, აქამდე გამოცემული სახელმძღვანელოებისაგან გამოირჩევა იმით, რომ აქ დიდმალიანი კონსტრუქციების პერსპექტივებს ეძღვნება სპეციალური თავი, ასევე მასში შეტანილია საქართველოს ხუროთმოძღვართა ნამუშევრები, განსაკუთრებით ხაზგასმულია მთიანი პირობების უპირატესობები ტერიტორიების რაციონალური ათვისების სტრატეგიისათვის. წიგნი დიდ დახმარებას გაუწევს არქიტექტურისა და მშენებლობის შემსწავლელებს და, ასევე, ამ დარგებში დასაქმებულ თეორეტიკოსებსა თუ პრაქტიკოსებს.
უაკ: 531.8
სახელმძღვანელო მოიცავს თეორიული მექანიკის კურსის პირველ (სტატიკა) და მეორე (კინემატიკა) ნაწილებს. კურსის კარგად დასაუფლებლად ყოველი თემის ბოლოში მოცემულია ბევრი მაგალითი და ამოცანა, რომელთა ამოხსნას ერთვის შესაბამისი მეთოდიკური მითითებანი. ამოხსნილი ამოცანების მეთოდიკური მითითებების დამუშავება და შესწავლა სტუდენტს საშუალებას მისცემს, დაეუფლოს სავარჯიშოდ მიცემული ამოცანების ამოხსნის ხერხებს და სათანადო დონეზე აითვისოს დისციპლინა. სახელმძღვანელოში შეტანილია მყარი სხეულის სტატიკის, წერტილისა და სხეულის კინემატიკის ბევრი ამოცანა დამოუკიდებელი მუშაობისათვის, ამიტომ მისი გამოყენება შეიძლება როგორც თეორიული მექანიკის ამოცანათა კრებულისა. განკუთვნილია უმაღლესი ტექნიკური სასწავლებლების სტუდენტებისათვის.
უაკ: 669.2/8 (075.8)
სახელმძღვანელოში განხილულია პირო და ჰიდრომეტალურგიული პროცე-სებისათვის განკუთვნილი ძირითადი აპარატურის კონსტრუქციული აღწერა და ტექნიკური მახასიათებლები. ყოველი თავის შემდეგ მოცემულია შესაბამისი პრაქტიკული სამუშაოები, აპარატებში მიმდინარე ტექნოლოგიური პროცესებისა და ზოგიერთი ჰიდრომეტალურგიული აპარატის გაანგარიშება.წიგნი განკუთვნილია ფერადი მეტალურგიის სპეციალობის ბაკალავრიატის სტუდენტებისთვის, ის ასევე დახმარებას გაუწევს ამ დარგის მაგისტრანტებსა და დოქტორანტებს.
უაკ: 323.28:327
სახელმძღვანელოში მეცნიერულად არის გაანალიზებული საერთაშორისო ტერორიზმის წარმოშობისა და განვითარების დინამიკა; პოლიტიკური და რელიგიური ტერორიზმის თანამედროვე პრობლემები; ახლო აღმოსავლეთსა და კავკასიის რეგიონში მოქმედი ტერორისტული ორგანიზაციების ანატომია; საერთაშორისო ტერორიზმის წინააღმდეგ წარმოებული მსოფლიო მასშტაბის ანტიტერორისტული კამპანიის სტრატეგია, ტაქტიკა და სხვა საკითხები. წიგნი შედგენილია საქართველოსა და საზღვარგარეთ გამოქვეყნებული სამეცნიერო და სასწავლომეთოდიკური ლიტერატურის გათვალისწინების საფუძველზე. სახელმძღვანელო განკუთვნილია სოციალური და ჰუმანიტარული სპეციალობის სტუდენტებისათვის, ასევე საერთაშორისო ურთიერთობებისა და ტერორიზმის პრობლემატიკით დაინტერესებულ მკითხველთა ფართო წრისათვის.
უაკ: 621.165-621.438
წიგნი არის ამავე ავტორის სახელმძღვანელოს „ორთქლის და აირის ტურბინების“ (თერმოდინამიკური ციკლები და ტურბინის საფეხურის თეორია) მეორე ნაწილი. აქ გაშუქებულია მრავალსაფეხურიან ორთქლის ტურბინასთან დაკავშირებული ყველა მნიშვნელოვანი საკითხი: ტურბინის სადენი ნაწილის გაანგარიშების საფუძვლები, ორთქლგანაწილების სისტემები, საკონდენსაციო დანადგარები, ტურბინების რეგულირება, თბოფიკაციური ორთქლის ტურბინები და სხვა. წიგნის მნიშვნელოვანი ნაწილი დაეთმო აირტურბინული, ორთქლაირული და კოგენერაციული დანადგარების სქემების აღწერას, მუშაობის პრინციპის, ენერგოეფექტურობის მაჩვენებლებისა და სხვა მახასიათებლების განხილვას.სახელმძღვანელო დაწერილია მოქმედი სილაბუსის შესაბამისად და განკუთვნილია ტექნიკური უნივერსიტეტის ენერგეტიკისა და ტელეკომუნიკაციის ფაკულტეტის „თბოენერგეტიკული დანადგარების“ მიმართულების ბაკალავრიატისა და მაგისტრატურის სტუდენტებისათვის. ამ წიგნით ასევე შეუძლიათ ისარგებლონ თბოელექტროსადგურებში მომუშავე ინჟინერტექნიკურმა მუშაკებმა და თბოენერგეტიკით დაინტერესებულმა პირებმა.
უაკ: 627.2/3
განხილულია ნავსადგურებისა და საზღვაო ტრანსპორტის დატვირთვა-განტვირთვის სამუშაოს მექანიზაციისა და ავტომატიზაციისათვის საჭირო თანამედროვე ტექნიკური აღჭურვა და შესაძლებლობანი. განკუთვნილია სახელმძღვანელოდ ტექნიკური უნივერსიტეტების საზღვაო ტრანსპორტის მიმართულების სტუდენტებისათვის.
უაკ: 681.3.06
წიგნში განხილულია WEB დოკუმენტების შესაქმნელად განკუთვნილი სცენარების სპეციალიზებული ენა Javascript-ი და ამ ენის შესაძლებლობების განმავითარებელი, ბოლო წლებში შემუშავებული ტექნოლოგიები: Ajax, jQuery და Json. სახელმძღვანელო განკუთვნილია ინფორმატიკის სპეციალობათა შემსწავლელი სტუდენტებისა და ამ საკითხით დაინტერესებული პირებისთვის.