უაკ: 622.675
სალექციო კურსში გაშუქებულია ვერტიკალური გვირაბების მშენებლობის ტექნოლოგიური პროცესები. აღწერილია ჭაურის პირის გაყვანისა და გამაგრების ძირითადი პროცესები, მოცემულია ჭაურის აგების სქემები. ნაშრომში დიდი ადგილი აქვს დათმობილი ბურღვა-აფეთქებით სამუშაოებს, სანგრევის განიავებას, ქანის დატვირთვას და მის განტვირთვას დღისეულ ზედაპირზე, წყალამოღვრას და მუდმივი სამაგრის ამოყვანის სამუშაოებს. ასევე განხილულია ჭაურების აგების თანამედროვე მოწყობილობები და კომპლექსები.ნაშრომში, გარდა ჭაურების მშენებლობის ძირითადი პროცესებისა, დეტალურად არის გადმოცემული ჭაურების რეკონსტრუქციის (ჩაღრმავების) ტექნოლოგიური პროცესები. აღწერილია ჭაურების რეკონსტრუქციის ზევიდან ქვევით და ქვევიდან ზევით ჩაღრმავების ხერხები, მათი თანმხლები პროცესები და თანამედროვე მოწყობილობათა კომპლექსები.ნაშრომი დიდად შეუწყობს ხელს სამთო ტექნოლოგიების დეპარტამენტის სტუდენტებს საგნის ცოდნისა და გაცნობიერების ამაღლებაში.
უაკ: 622.235
სალექციო კურსში მოცემულია ქანების აფეთქებით რღვევის წინააღმდეგობის საერთო შეფასება, ქანების ბურღვადობა; გაშუქებულია აფეთქების მოვლენის ფიზიკური არსი; გადმოცემულია ფეთქებად ნივთიერებათა დეტონაციის თეორიის საფუძვლები; აღწერილია ქიმიური ფეთქებადი ნივთიერებებისა და სამრეწველო ფეთქებადი ნივთიერებების ძირითადი მახასიათებლები და გამოყენების პირობები. განმარტებულია აფეთქებით ქანის დანგრევის მექანიზმი, ასაფეთქებელი სამუშაოების ხერხები და მეთოდები. აღნიშნული ნაშრომი დიდად შეუწყობს ხელს სამთო ტექნოლოგიების დეპარტამენტის სტუდენტებს საგნის ცოდნისა და გაცნობიერების ამაღლებაში.
უაკ: 721.021.22
სალექციო კურსში განხილულია სამოქალაქო შენობების ძირითადი არქიტექტურულ-კონსტრუქციული სისტემები და გეგმარებითი სქემები. დეტალურადაა გაანალიზებული მრავალსართულიანი და მაღლივი საცხოვრებელ და საზოგადოებრივ შენობებში გამოყენებული კონსტრუქციული სისტემები, თანამედროვე საფასადე სისტემები და მასალები. განხორციელებული არქიტექტურული ობიექტების მაგალითებზე განხილულია ფასადისა და არქიტექტურულ-კონსტრუქციული ელემენტების მოწყობის კვანძები.განკუთვნილია არქიტექტურის ფაკულტეტის სტუდენტებისათვის.
უაკ: 801.3
უახლესი ეკონომიკური ლექსიკონი შეიცავს 3000-ზე მეტ ტერმინს. მასში ფართოდ არის მოცემული ეკონომიკური, იურიდიული, ტექნიკური, ტექნოლოგიური, ფსიქოლოგიური, სოციოლოგიური და სხვა სიტყვათა განმარტებები.ლექსიკონი დახმარებას გაუწევს როგორც მეცნიერ-ეკონომისტებს, ისე პრაქტიკოსებს, ბაკალავრებს, მაგისტრანტებს, დოქტორანტებსა და სხვა დაინტერესებულ პირებს.
უაკ: 551.7
სალექციო კურსში განხილულია სტრატიგრაფიის ადგილი სხვა გეოლოგიურ მეცნიერებებს შორის, მისი ისტორიის ძირითადი ეტაპები. სალექციო კურსი ეძღვნება სტრატიგრაფიული მეთოდების პრაქტიკული გამოყენების საკითხებს, რომელიც დაფუძნებულია შრეებრივი ქანების შედგენილობაზე, მათ ფიზიკურ და ქიმიურ მახასიათებლებზე და მათში დაცული უძველესი ორგანიზმების ნაშთებზე. სპეციალური თავი ეძღვნება სტრატიგრაფიაში დროის საერთო პრინციპებსა და პრობლემას. დეტალურადაა განხილული თეორიული საფუძვლები, თითოეული მეთოდის, მათ შორის თანამედროვე, პრაქტიკული გამოყენების შესაძლებლობები და მათი შეზღუდვები. განსაკუთრებული ყურადღება ეთმობა სტრატიგრაფიის წამყვან მეთოდს – ბიოსტრატიგრაფიულს და შემთხვევებს, რომლებიც ართულებენ სტრატიგრაფიულ აგებებში პალეონტოლოგიური მასალის გამოყენებას. ცალკეული თავები ეძღვნება სტრატიგრაფიული დანაყოფების განხილვას, მისი კლასიფიკაციის საკითხებს და ტერმინოლოგიას.სალექციო კურსი განკუთვნილია გეოლოგიის სპეციალობის სტუდენტებისათვის. სასარგებლო იქნება ასევე გეოლოგების ფართო წრისათვის, რომლებიც სწავლობენ შრეებრივ დასტებს.
უაკ: 72
სალექციო კურსში განხილულია არქიტექტურის თეორია და მისი ინტერპრეტაციის პრაქტიკა, თანამედროვე არქიტექტურის ძირითადი კონცეფციები და ამა თუ იმ თეორიული მიდგომის გამოყენების შესაძლებლობა კონკრეტული ობიექტის ანალიზისას. განსაკუთრებული ყურადღებაა გამახვილებული არქიტექტურული შემოქმედების ფსიქოლოგიურ და სოციალურ ასპექტებზე. სალექციო კურსი მოიცავს ისეთ საკითხებს, როგორიცაა: შემოქმედებითი ჰიპოთეზები, ტრადიცია და თანამედროვეობა, რეგიონალიზმი არქიტექტურაში, ისტორიზმის ფაქტორი XXI საუკუნის არქიტექტურაში, ახალი შენობა ისტორიულ და ლანდშაფტურ გარემოში; კონტექსტი და კონტრასტი, ინდუსტრიული არქეოლოგია და სხვა. ნაშრომი განკუთვნილია სტუ-ის არქიტექტურის, ურბანისტიკის და დიზაინის ფაკულტეტის მაგისტრანტებისთვის. იგი გამოადგება დაინტერესებულ პირებსაც.
უაკ: 5236
სალექციო კურსში განხილულია კლასიკური და თანამედროვე ასტრონომიის საკითხები, შინაარსი ზოგადი ასტრონომიის საფუძვლების აუცილებელი მინიმუმის მასალას მოიცავს. ასტრონომიულ ცნებებსა და მოვლენებში ჩაწვდომა ძირითადად მოითხოვს კარგად განვითარებულ სივრცულ წარმოდგენებს. ამ მიზნით მოცემულია მრავალი თვალსაჩინოება, ნახაზი და სხვა; სალექციო კურსში მოცემულია სფერული და პრაქტიკული ასტრონომიის ელემენტები, ასევე მზისა და მთვარის ხილული და ნამდვილი მოძრაობა, დედამიწისა და პლანეტების მზის გარშემო მოძრაობა, მზისა და მთვარის დაბნელება, ცის სფერო და მისი მახასიათებლები, ციური კოორდინატები და მათი გარდაქმნები, კალენდარული სისტემების აგება, ასტრონომიული ინსტრუმენტები, მნათობამდე მანძილის განსაზღვრა, ვარსკვლავთა ზოგადი დახასიათება, ვარსკვლავის სპექტრული კლასიფიკაცია, ჩვენი და გარე გალაქტიკის ობიექტთა ზოგადი დახასიათება. მოყვანილია კონკრეტული ამოცანების ამოხსნის ნიმუშები და შესაბამისი მეთოდიკური მითითებები.სალექციო კურსი განკუთვნილია სტუ-ის მათემატიკის დეპარტამენტის, ინფორმატიკისა და მართვის სისტემების ფაკულტეტის სტუდენტებისათვის.
უაკ: 620.22:669.2/.8
სალექციო კურსში განხილულია ტექნიკაში გამოყენებული შავი და ფერადი ლითონების, არალითონური და კომპოზიციური საკონსტრუქციო მასალების აგებულება, თვისებები, გამოყენების სფეროები და ნაკეთობის თვისებათა სასურველი მიმართულებით შეცვლის ხერხები და საშუალებები. ყურადღება გამახვილებულია ელექტროტექნიკასა და ენერგეტიკაში გამოყენებული სპეციალური დანიშნულების მასალებზე, მათ სტრუქტურასა და თვისებებს შორის კავშირზე.განკუთვნილია ენერგეტიკისა და ელექტროინჟინერიის სპეციალობის ბაკალავრიატის სტუდენტებისათვის.
უაკ: 541.13
დამხმარე სახელმძღვანელოში განხილულია ელექტროქიმიური სისტემების არსი და ელექტროქიმიური თერმოდინამიკისა და კინეტიკის ძირითადი დებულებები. ყურადღება ეთმობა თეორიული ელექტროქიმიის კანონზომიერებების კავშირს გამოყენებითი ელექტროქიმიის პრობლემებთან.მასალის უკეთესად ათვისების მიზნით დამხმარე სახელმძღვანელოში შეტანილია ტექნიკური ელექტროლიზის მატერიალური და ენერგეტიკული პარამეტრების გაანგარიშების მაგალითები ამოხსნილი ამოცანებითურთ.დამხმარე სახელმძღვანელო განკუთვნილია ქიმიისა და ქიმიური ტექნოლოგიის ფაკულტეტის სტუდენტებისთვის.