საკაცე (ავადმყოფი საკაცეზე დააწვინეს); საკაცო (საკაცო საქმე).

საკბილე: კბილებისთვის განკუთვნილი (საკბილე მორჩი...); საკბილო: 1. შესაჭმელი (მგელმა საკბილო დაინახა); 2. გადატ. რაიმე ქმედების (ძირითადად უარყოფითი) სავარაუდო ობიექტი (საკბილო ვერაფერი იპოვა).

საკითხი: რაც გარკვევას, გადაწყვეტას, განხილვას საჭიროებს; რაზეც მსჯელობენ; რასაც იკვლევენ (საკვლევი / საჭირბოროტო საკითხი); შდრ.: დროის / ზრდილობის საკითხი; საკითხავი: 1. რაც უნდა ჰკითხონ ან იკითხონ, შესაკითი; 2. ვინც ან რაც უნდა მოიკითხონ; ვისი ან რისი ამბავიც უნდა იკითხონ (საკითხავი კაცი / ამბავი...); 3. რაც უნდა წაიკითხონ, კითხვისათვის განკუთვნილი, წასაკითხი (საკითხავი წიგნი...).

საკორექტორო: კორექტორებისათვის განკუთვნილი (საკორექტორო ოთახი); საკორექტურო: კორექტურისთვის განკუთვნილი; რაც კორექტურას საჭიროებს (საკორექტურო ანაბეჭდი).

სალტე: ლითონის რკალი (რაიმეს გასამაგრებლად); შდრ.: სალტო: 1. აკრობატული ნახტომი, რომლის დროსაც სხეული ჰაერში ამოტრიალდება; 2. გადატ. სახიფათო ნაბიჯი.

სამათხოვროდ: მათხოვრობის მიზნით: „რამდენიმე კაცი სოფლიდან წასულიყო სამათხოვროდ ქალებით და ბავშვებით“ (დ. კლდ.); სანათხოვროდ: დროებით სათხოვებლად: „იქნება სანათხოვროდ მაინც ვიშოვოთ სადმე ცალი ჩექმა“ (ა. ბელ.).

სამამულე (რქა); სამამულო (ომი / ნაწარმი).

სამწერლო (ასპარეზი); სამწერლობო (ენა).

სამწყე[მ]სავი: რაც უნდა მწყემსონ (სამწყესავი ნახირი); სამწყესური: ადგილი, სადაც საქონელს მწყემსავენ.

სანაშენე (მეურნეობა); სანაშენო (საქონელი).

სანიშნე და სანიშნო ერთ შემთხვევაში სინონიმებია და ნიშნავს: რასაც უმიზნებენ, ნიშანში ამოსაღები (სანიშნე / სანიშნო ფიცარი...), მაგრამ სანიშნოს განსხვავებული მნიშვნელობაც აქვს: რითაც უნდა ანიშნონ, ნიშნის მისაცემი; სასიგნალო (სანიშნო ალამი / ზარი...).

სანიშნი, სანიშნებელი: რითაც უნდა ანიშნონ, ნიშნის მისაცემი; სასიგნალო (ხმა, ალამი, ზარი...); შდრ: სანიშნი წიგნისთვის /ბლოკნოტისთვის; სანიშნე: რასაც უმიზნებენ, ნიშანში ამოსაღები (სანიშნე ფიცარი...).

საპილოტე: პილოტისთვის განკუთვნილი (საპილოტე ფორმა); საპილოტო: რისი პილოტი­რებაც უნდა მოხდეს; რაც უნდა გამოიცადოს, შემოწმდეს (სახელმძღვანელოს საპი­ლოტო ვერსია; საპილოტო პროგრამა / პროექტი).

სარეწაო: რეწვასთან დაკავშირებული (სარეწაო გადასახადი / კოოპერაცია / ფლოტი); სარეწი: მოპოვებითი ხასიათის საწარმო ან საწარმოთა ქსელი: მარილის / ნავთის / თევზის / ოქროს... სარეწი.

სარძევე (ჭურჭელი / ჯირკვლები / კბილები); სარძეო (მეურნეობა).

სარწყავი და სარწყული ერთ შემთხვევაში სინონიმებია და ნიშნავს: 1. ღვინის, მარცვლეუ­ლის... საწყაო; 2. ჭურჭელი, რომელსაც აქვს ტუჩი ძაბრისმაგვარი დაჩვრეტილი ბოლოთი (ხმარობენ ბაღის, ბოსტნის... მოსარწყავად), მაგრამ სარწყავს სხვა მნიშვნელობებიც აქვს: 1. რაც ირწყვება (სარწყავი მინდორი); 2. რითაც რწყავენ (სარწყავი სისტემა); სარწყულებელი: 1. რასაც წყალი უნდა დაალევინონ (სარწყულებელი საქონელი); 2. ადგილი. სადაც პირუტყვს წყალს ასმევენ.

სასმელი: რაც უნდა სვან (სასმელი წყალი; ალკოჰოლიანი სასმელი); სასმისი: ჭურჭელი, რითაც ღვინოს ან სხვა მაგარ სასმელს სვამენ (კათხა, ყანწი, ფიალა...).

საუკუნო: სამუდამო, სამარადისო, მუდმივი: „სიყვარული ისა სჯობს, რაც ძველია, საუკუნო მეგობრობის მცველია“ (აკაკი); საუკუნე: დროის მონაკვეთი (ასი წელი); საუკუნეობრივი: დიდი ხნის, ხანგრმლივი (საუკუნეობრივი ოცნება).

საქმიანი: 1. საქმის მქონე, მცოდნე, მოყვარული (საქმიანი ადამიანი); 2. საქმესთან დაკავში­რებული (საქმიანი ქაღალდები); 3. ლაკონიური, დაწურული, არსებითი; მხოლოდ საკითხთან დაკავშირებული (საქმიანი ლაპარაკი); საქმოსანი: ვინც თავის საქმიანობაში მხოლოდ პირადი (პრაქტიკული, ჩვეულებრივ, კომერციული) ინტერესებით ხელმძღვანელობს.

საქორწილო (მზადება); საქორწინო (ბეჭედი).