უაკ: 681.33
სახელმძღვანელოში განხილულია საკაბელო ტელეკომუნიკაციის დაფუძნებისა და განვითარების ეტაპები, ინფორმაცია, სიგნალი და ის მეთოდები, რომლებიც ინფორმაციების ერთდროულ და შორ მანძილზე გადაცემას უზრუნველყოფს, ასევე მულტიპლექსირების სიხშირული მეთოდი და მასთან დაკავშირებული ელექტრული მოწყობილობები, დროითი (PDH, SDH, Ethernet), ოპტიკური მულტიპლექსირების მეთოდი და მასთან დაკავშირებული მოწყობილობები. მოყვანილია თანამედროვე ოპტიკური ტექნოლოგიების დახასიათება (WDM, DWDM, CWDM, OTN და ა.შ.), დადებითი, უარყოფითი თვისებები და ამ ტექნოლოგიების პრაქტიკული დანერგვის აუცილებლებლობა, კერძოდ ოპტიკური ტექნოლოგიების შესაბამისი მოწყობილობების აგების პრინციპები, რომლებიც ახსნილია სტრუქტურული სქემებისა და დროითი დიაგრამების საშუალებით; ტექნოლოგიები, რომლებიც გამოიყენება ოპტიკური სიგნალის ტელეკომუნიკაციის ბოჭკოვან-ოპტიკურ ხაზით ტრანსპორტირებისთვის, შესაბამისი მულტიპლექსირება-დემულტიპლექსირების საკითხის განხილვის საფუძველზე.
სახელმძღვანელო განკუთვნილია ციფრული ტელეკომუნიკაციის ბაკალავრიატის სტუდენტებისთვის, სასარგებლო იქნება ამავე სპეციალობის მაგისტრანტებისა და ტელეკომუნიკაციის სფეროში მომუშავე ინჟინერ-ტექნიკური პერსონალისთვის.
უაკ: 622.8:61.(075.771)
წარმოდგენილია შრომის კანონმდებლობის, შრომის უსაფრთხოების სამედიცინო-ბიოლოგიური და სანიტარიულ-ჰიგიენური საფუძვლები. სამთო პროფილის საწარმოებში ტრავმატიზმის გამომწვევი ძირითადი რისკები და მათი შეფასება; შრომისა და საინჟინრო ფსიქოლოგიის შრომისდაცვითი ასპექტები. ჩამოყალიბებულია სამუშაო გარემოში აირისა და მტვრის აფეთქების, მიწისქვეშა და ზედაპირული ხანძრების წარმოქმნის პრევენციული ღონისძიებები და წარმოქმნილი ხანძრების წინააღმდეგ ბრძოლის მეთოდები და საშუალებები, აგრეთვე სამთომაშველი საქმის საფუძვლები.
სახელმძღვანელო განკუთვნილია საქართველოს ტექნიკური უნივერსიტეტის სამთო-გეოლოგიური ფაკულტეტის ბაკალავრიატის სტუდენტებისათვის.
უაკ: 008
სახეთა ამოცნობა სათავეს ინჟინერიაში იღებს, მაშინ, როდესაც მანქანური სწავლება კომპიუტერული მეცნიერებიდან წარმოიშვა. თუმცა ეს მიმართულებები განიხილება, როგორც ერთი და იგივე სფეროს ორი ასპექტი. მათ ერთად განიცადეს მნიშვნელოვანი განვითარება ბოლო ათი წლის განმავლობაში. აღნიშნული მიმართულებები მეცნიერების ძალზე აქტუალური, თანამედროვე ნაწილებია და ფართოდ გამოიყენება ადამიანის საქმიანობის მრავალ დარგში.
სახელმძღვანელოში განხილულია მანქანური სწავლების ძირითადი მეთოდები, მათი რეალიზაციის ალგორითმები და გამოყენების მაგალითები. კერძოდ, ისეთი საკითხები, როგორიცაა დამოკიდებულების აღდგენა, გადაწყვეტილების თეორია, ინფორმაციის თეორია, ალბათური განაწილებები, ალბათური მოდელები, რეგრესიის წრფივი მოდელები, ბაიესური მოდელები, კლასიფიკაციის წრფივი მოდელები, მანქანური სწავლების ალგორითმები, ნეირონული ქსელები და ბირთვული მეთოდები.
განკუთვნილია ინფორმატიკისა და მართვის სისტემების ფაკულტეტის ბაკალავრიატისა და დოქტორანტურის სტუდენტებისათვის. დახმარებას გაუწევს სხვადასხვა დარგში მომუშავე მკლევრებსა და მეცნიერებს.
უაკ: 53.08
სახელმძღვანელოში განხილულია გამზომი ხელსაწყოებისა და დანადგარების ნაირსახეობა - დაწყებული უმარტივესი ანალოგური ელექტრომექანიკური ხელსაწყოებიდან დამთავრებული იმპულსური და ციფრული, პროგრამულად მართვადი გამზომი ტექნიკითა და ვირტუალური ხელსაწყოებით. მოცემულია მათი სტრუქტურული სქემები და ცალკეული კვანძების დანიშნულება, ინფორმაციული გაზომვითი სიგნალების გარდაქმნის თვალსაზრისით; სხვადასხვა სახის (ინფორმაციული თუ ხელშეშლის) სიგნალების წყაროები, მათი ვიზუალიზაციისა და სპექტრული ანალიზის საშუალებები; გაზომვის მრავალფეროვანი მეთოდები, რომელთა რეალიზაცია ხორციელდება ამ ხელსაწყოების მეშვეობით.
განსახილველი მასალა შერჩეულია და დალაგებული უცხოენოვანი სახელმძღვანელოების გამოცდილების გათვალიწინებით, თუმცა ცალკეულ თავებში გამოყენებულია საჭირო ინფორმაცია არა მხოლოდ რუსი ავტორების (ნეფედოვის, დვორიაშინის, ჩუიკოს და სხვათა) სახელმძღვანელოებიდან, არამედ ქართული გამოცემებიდანაც (ავტორები: ზ. აზმაიფარაშვილი, ძმები მურჯიკნელები, ი. ზედგენიძე, ი. ჩხეიძე), აგრეთვე მასალები შესაბამისი პროფილის ოფიციალური ვებსაიტებიდან; მასალა გამდიდრებულია პრაქტიკულ მეცადინეობებზე განსახილველი ამოცანებით.
განკუთვნილია ინფორმატიკისა და მართვის სისტემების ფაკულტეტის ციფრული სატელეკომუნიკაციიო ტექნოლოგიების მიმართულების სტუდენტებისათვის, ასევე გამოადგება ამ სფეროში მოღვაწე პირებს.
უაკ: 699.82
ნაშრომში გადმოცემულია სპეციალური დანიშნულების ჰიდროსაიზო-ლაციო, თბოსაიზოლაციო და მოსაპირკეთებელი მასალების ქიმიური შედგენილობა და სტრუქტურა, ფიზიკურ-მექანიკური თვისებები, გამოცდის მეთოდები და გამოყენების სფეროები.
წიგნი განკუთვნილია სამშენებლო ფაკულტეტის ბაკალავრიატისა და მაგისტრატურის სტუდენტე-ბისათვის; ასევე დიდ პრაქტიკულ დახმარებას გაუწევს მშენებლობაზე მომუშავე ინჟინერ-ტექნიკურ პერსონალს.
უაკ: 681.5
პროგრამირებადი ლოგიკური კონტროლერებისა (PLC) და მათი პროგრამული უზრუნველყოფის ფართო გამოყენებამ როგორც ტექნიკური სისტემების, ისე ტექნოლოგიური პროცესების მართვის ავტომატიზებულ სისტემებში მოითხოვა კვალიფიციური კადრების მასობრივი მომზადების აუცილებლობა.
სახელმძღვანელოში განხილულია მსოფლიო ლიდერის, წარმოების პროცესების ავტომატიზაციასა და გაციფრულებაში, გერმანული ტექნოლოგიური კონგლომერანტის, Siemens AG-ს PLC S7-1200 PLC და მისი დაპროგრამების გარემო TIA Portal.
ნაშრომში დეტალურადაა აღწერილი TIA Portal Basic-ის ჩამოტვირთვა და ინსტალაცია, PLC-ს არქიტექტურის ელემენტები, CPU-ს მუშაობის რეჟიმები, ხდომილების პრიორიტეტები და რიგები, CPU-ს მეხსიერება, მისი არეები და დამისამართება, მონაცემთა ტიპები, კონფიგურირება, კოდური ბლოკები, ინსტრუქციები, პროგრამების შედგენა გაწყობა და ტესტირება.
დიდი ადგილი აქვს დათმობილი ადამიანი-მანქანური ინტერფეისებისა (HMI) და პანელების აღწერას, მათ როლს ავტომატიზებული სისტემების ორგანიზებაში, განმარტებულია მათი დამისამართების ხერხები, მონაცემების გაცვლა HMI-სა და PLC-ის შორის.
სახელმძღვანელო განკუთვნილია ინფორმატიკისა და მართვის სისტემების ფაკულტეტის ბაკალავრიატის საფეხურის სტუდენტებისათვის, იგი წარმოადგენს პირველ მცდელობას ამ ტიპის სახელმძღვანელოს შექმნისა ქართულენოვანი სტუდენტებისათვის და დარწმუნებული ვართ, ღირსეულ წვლილს შეიტანს ჩვენი ქვეყნის ავტომატიზებული საწარმოებისათვის კვალიფიციური კადრების მომზადების საქმეში.
უაკ: 663.2/.3
განხილულია ცქრიალა ღვინის წარმოშობის ისტორია, კლასიფიკაცია და ევროპის სხვადასხვა ქვეყანაში გავრცელებული წარმოების მეთოდები. დეტალურადაა აღწერილი ცქრიალა ღვინის დამზადების ტექნოლოგიური ოპერაციები, სენსორული მახასიათებლები და მისთვის დამახასიათებელი დეფექტები.
სახელმძღვანელო განკუთვნილია ენოლოგების, ცქრიალა ღვინის მწარმოებლების, სტუდენტებისა და ღვინის ენთუზიასტებისათვის.
სახელმძღვანელოში განხილულია სატელეკომუნიკაციო ანალოგურ და ციფრულ სისტემებში პირველადი და საარხო სიგნალების ფორმირების მექანიზმები და დასაბუთებულია აღნიშნული პროცედურების აუცილებლობა. წარმოდგენილია რეალური პირველადი სატელეკომუნიკაციო სიგნალების მახასიათებლები და პარამეტრები; სატელეკომუნიკაციო სისტემებში გამოყენებული ანალოგური, დისკრეტული, იმპულსური და ციფრული მოდულაციების სახეობები, მათი შესაბამისი დროითი და სპექტრული დიაგრამები. მოყვანილია ანალოგური სიგნალიდან ციფრული სიგნალის ფორმირების ეტაპები და რეალური სიგნალებისთვის ციფრული სიგნალების პარამეტრების ანგარიში; ასევე სატელეკომუნიკაციო ანალოგური, ციფრული და ფართოზოლოვანი არხების პარამეტრები და მახასიათებლები, რომლებიც შედარებულია შესაბამისი სიგნალების მახასიათებლებსა და პარამეტრებთან. სახელმძღვანელოს ყველა თავი შეიცავს საკონტროლო კითხვებს.
სახელმძღვანელო განკუთვნილია „ციფრული სატელეკომუნიკაციო ტექნოლოგიების“ საბაკალავრო პროგრამის სტუდენტებისათვის, ასევე გამოადგება ამავე სფეროში მომუშავე პერსონალს და დარგში მომუშავე სპეციალისტებს.
უაკ: 577.1
სახელმძღვანელოში განხილული ბიომექანიკისა და ფოტოსინთეზის მოლეკულური საფუძვლები. ყურადღება გამახვილებულია კლიმატის ცვლილებებთან დაკავშირებულ ისეთ საკითხებზე, როგორიცაა გლობალური დათბობა და მცენარეთა ენერგეტიკულ-ფოტოსინთეზურ შესაძლებლობათა და მათი ბიოლოგიური პოტენციალის გაზრდა. განახლებული სახით წარმოდგენილია ალბათობისა და სტატისტიკის ელემენტები, ბიოქიმიის განვითარების ქრონოლოგია; დამატებულია ორგანულ ნაერთთა კლასიფიკაციისა და ნომენკლატურის წარმოების ძირითადი წესები, დაავადებათა ლექსიკონი და მრავალი სხვადასხვა სახის საცნობარო მასალა. სახელმძღვანელო გამდიდრებულია ფერადი ილუსტრაციებით, დიაგრამებითა და ცხრილებით.
სახელმძღვანელო განკუთვნილია უმაღლესი სასწავლებლების სტუდენტებისათვის, დახმარებას გაუწევს პროფესორ-მასწავლებლებს, ახალგაზრდა მეცნიერებსა და ბიოქიმიით დაინტერესებულ ყველა მსურველს.